Отырар ауданында республикалық референдум аясында ұлттық спорт өкілдері де белсенділік танытып, өз таңдауларын жасады. Ауданның бір топ көкпаршылары дауыс беру учаскесіне арнайы келіп, азаматтық борыштарын орындап, ел болашағына қатысты маңызды саяси науқанға қатысу арқылы көпшілікке үлгі көрсетті.
Дауыс беру учаскесіне жиналған шабандоздар ұлттық спортқа деген құрметін көрсетіп қана қоймай, қоғамдағы маңызды шешімдерге бейжай қарамайтындықтарын да білдірді. Олар референдум – ел дамуына ықпал ететін маңызды саяси қадам екенін атап өтті.
Шараға Отырар аудандық көкпар федерациясының президенті Жұмабай Сәрсенбаев бастаған ұлттық спорт жанашырлары қатысты. Оның айтуынша, мұндай маңызды кезеңде әрбір азамат ел тағдырына жауапкершілікпен қарап, өз таңдауын жасауы тиіс.
– Референдум – халықтың еркін білдіретін маңызды демократиялық құрал. Сондықтан ел болашағына қатысты шешім қабылданатын сәтте әрбір азамат белсенділік танытып, дауыс беру арқылы өз пікірін білдіруі керек, – деді Жұмабай Сәрсенбаев.
Көкпаршылардың референдумға топ болып келіп дауыс беруі аудан тұрғындарының назарын аударып, жастарға азаматтық белсенділіктің үлгісін көрсетті. Ұлттық спорт өкілдерінің мұндай бастамасы қоғамдағы бірлік пен жауапкершіліктің маңызын тағы бір мәрте айқындады.
Жалпы, Отырар ауданында референдум учаскелері штаттық режимде жұмыс істеп тұр. Тұрғындар маңызды саяси науқанға белсенді қатысып, ел болашағына қатысты өз таңдауларын жасауда.