Қазіргі таңда табиғи су ресурстарын сақтау және тиімді пайдалану мәселесі әлемдік деңгейде өзекті болып отыр. Осы бағытта Қазақстанда Мемлекет басшысы Қасым-Жомарт Тоқаевтің бастамасымен «Мөлдір бұлақ» экологиялық акциясы жүзеге асырылуда. Бұл бастама табиғи су көздерін қорғау, бұлақтардың көзін ашу және оларды қалпына келтіру арқылы қоршаған ортаны сақтауға бағытталған маңызды қадам болып табылады.
Аталған акция Мемлекет басшысы ұсынған «Таза Қазақстан» жалпыұлттық бағдарламасы шеңберінде іске асырылып, ел аумағындағы бұлақтарды анықтау, тазарту, қалпына келтіру және қорғау аймақтарын белгілеу сияқты кешенді жұмыстарды қамтиды. Сонымен қатар бұл бастама қоғамда экологиялық мәдениетті қалыптастыруға және табиғатты қорғауға деген жауапкершілікті арттыруға бағытталған.
Түркістан облысы табиғи су көздеріне бай өңірлердің бірі саналады. Мамандардың мәліметінше, облыс аумағында шамамен 1500-ге жуық бұлақ бар. Алайда уақыт өте келе олардың бір бөлігі бітеліп немесе құрғап қалған. Осыған байланысты өңірде бұлақ көздерін анықтау, тазарту және қайта қалпына келтіру жұмыстары кезең-кезеңімен жүргізілуде.
Жүргізілген зерттеулер нәтижесінде облыста 100-ден астам бұлақты қайта жандандыруға мүмкіндік бар екені белгілі болды. Олардың бірқатарын механикалық тазалау арқылы қалпына келтіруге болады, ал кейбіріне арнайы гидрологиялық жұмыстар жүргізу қажет.
«Мөлдір бұлақ» акциясының басты ерекшелігі – оның қоғамдық сипатқа ие болуы. Экологиялық бастамаға мемлекеттік мекемелермен қатар еріктілер, жастар ұйымдары, қоғамдық бірлестіктер және жергілікті тұрғындар белсенді қатысып, табиғатты қорғау ісіне өз үлестерін қосуда.
Бұлақ көздерін қалпына келтіру ауылдық елді мекендерді таза ауызсумен қамтамасыз етуге, табиғи тепе-теңдікті сақтауға, сондай-ақ өңірдің экологиялық жағдайын жақсартуға мүмкіндік береді. Сонымен бірге бұл жұмыстар туризм мен ауыл шаруашылығының дамуына да оң әсерін тигізеді.
Қазақ халқы ежелден табиғатты ерекше қадірлеген. «Бұлақ көрсең, көзін аш» деген халық даналығы табиғатты қорғаудың маңызын айқын көрсетеді.
Осылайша, «Мөлдір бұлақ» экологиялық акциясы табиғи су ресурстарын сақтауға бағытталған маңызды бастама ретінде алдағы уақытта да жалғасын табады. Табиғатты қорғау – әрбір азаматтың ортақ міндеті әрі болашақ ұрпақ алдындағы жауапкершілік.