Қазақстанда Ұлыстың ұлы күні – Наурыз мейрамын жаңа форматта ұйымдастырудың қорытындылары таныстырылды. Биыл мерекелік іс-шаралар дәстүрлі мазмұнды сақтай отырып, цифрлық технологиялармен ұштастырылып, кең ауқымда өткізілді.
Қазақстан бойынша «Наурызнама» онкүндігі аясында 7 мыңнан астам мәдени және қоғамдық іс-шара ұйымдастырылды. Оның ішінде 1 мыңнан астамы цифрлық форматта өткізіліп, онлайн алаңдар арқылы халыққа ұсынылды.
Мерекелік бағдарламалар әлеуметтік желілер мен бұқаралық ақпарат құралдарында кеңінен жарияланып, жалпы онлайн қамту көлемі 14 миллион адамға жетті. Сонымен қатар eGov экожүйесі арқылы қазақстандықтар бір-біріне 5 миллионнан астам мерекелік құттықтау жолдады.
Ұйымдастырушылардың айтуынша, «Digital Nauryz» платформасы ұлттық дәстүрлерді заманауи технологиялармен үйлестіріп, мерекені жаңа деңгейде атап өтуге мүмкіндік берді. Цифрлық форматтағы концерттер, мәдени бағдарламалар, онлайн кездесулер мен түрлі интерактивті жобалар көпшілікке қолжетімді болды.
Жоба аясында іске қосылған платформа 80 мыңнан астам белсенді қолданушыны біріктіріп, мерекелік іс-шараларға кең аудиторияның қатысуына жағдай жасады.
Осылайша, «Digital Nauryz» бастамасы ұлттық мәдениетті заманауи форматта насихаттаудың тиімді үлгісіне айналып, дәстүр мен цифрлық технологияның үйлесімді дамуына жол ашқан маңызды жоба ретінде бағалануда.