Арыста Мемлекет басшысының «Кітап оқитын ұлт» бастамасы аясында оқырмандарды кітап оқуға баулитын ерекше жоба қолға алынды.
Арыс қалалық Абай атындағы Орталық кітапхана ұйымдастырған «Күніне 20 минут кітап оқы» жобасының мақсаты – тұрғындар мен жас ұрпақтың кітап оқуға деген қызығушылығын арттырып, күнделікті оқу мәдениетін қалыптастыру.
Жоба аясында кітапханаға келген оқырмандар мен мектеп оқушылары күн сайын 20 минут уақытын кітап оқуға арнайды. Бұл – көп уақытты қажет етпейтін, алайда адамның ой-өрісін кеңейтіп, танымын арттыруға ықпал ететін пайдалы әдет.
Ұйымдастырушылардың айтуынша, кітап оқуды күнделікті дағдыға айналдыру арқылы қоғамда оқу мәдениетін қалыптастыруға болады. Өйткені кітапқа бөлінген әрбір минут – білім мен рухани дамуға жасалған қадам дейді олар.
