Биыл Қазақстанда Ұлыстың ұлы күні – Наурыз мейрамы ерекше форматта ұйымдастырылып, дәстүрлі мәдениет пен заманауи технологиялар үйлесім тапты. Цифрлық шешімдер мен инновациялық жобалар мерекелік іс-шаралардың мазмұнын байытып, Наурызды жаңа деңгейде атап өтуге мүмкіндік берді.
Мерекелік алаңдарда дәстүрлі киіз үйлермен қатар виртуалды кеңістіктер, VR-аймақтар мен жасанды интеллектке негізделген жобалар ұсынылды. Заманауи технологиялар арқылы келушілер интерактивті бағдарламаларға қатысып, ұлттық құндылықтарды жаңа форматта танып-білуге мүмкіндік алды.
Сонымен қатар ұлттық ойындардың цифрлық үлгілері де көпшіліктің қызығушылығын тудырды. Атап айтқанда, робототехника элементтері қолданылған «Robot күресі» және «робот-көкпар» турнирлері ұйымдастырылып, жастар арасында ерекше қызығушылыққа ие болды.
Қала көшелерінде LED-туннельдер мен видеоаватарлар орнатылып, мерекелік атмосфераны арттыра түсті. Кейбір локацияларда ұлттық тағамдарды жеткізу үшін дрондар пайдаланылып, заманауи технологиялардың мүмкіндіктері көрсетілді.
Мерекелік бағдарлама аясында инновациялық бағыттағы бірқатар іс-шаралар да өткізілді. Атап айтқанда, жас өнертапқыштар мен IT-мамандарға арналған хакатондар, стартап жобаларын таныстыруға арналған Baursaq Pitch алаңы және жастарға арналған жасанды интеллект бойынша арнайы интенсивтер ұйымдастырылды.
Осылайша, цифрлық форматта өткен Наурыз мерекесі ұлттық дәстүрлер мен жаңа технологиялардың үйлесімді дамуын көрсетіп, көктемнің басты мерекесін ауқымды инновациялық фестивальге айналдырды.