23 тамызда өтетін Құрылтай сайлауына санаулы күн қалды. 19 тамызда сайлауалды науқанның маңызды кезеңдерінің бірі – «Басты дебат – 2026» өтті. 24KZ телеарнасындағы пікірталас алаңына сайлауға қатысатын жеті саяси партияның көшбасшылары жиналып, елдің әлеуметтік-экономикалық дамуына қатысты өз ұстанымдарын таныстырды. Дебат барысында экономикалық өсім, халықтың табысы, ауыл шаруашылығы, әлеуметтік саясат, еңбек нарығы және экология мәселелері талқыланды. Партия жетекшілері сайлауалды бағдарламаларының негізгі бағыттарын ұсынып, бір-біріне және көрермендер тарапынан қойылған сауалдарға жауап берді. «Басты дебат – 2026» сайлаушыларға партиялардың бағдарламалары мен басымдықтарын салыстырып, саналы таңдау жасауға мүмкіндік берген маңызды саяси алаң болды.
