Ұлттың үнжарғысы атанған Қазақ радиосының 100 жылдық мерейтойына орай, Мемлекет басшысының Жарлығымен өткен жылы 1 қазан – Радио күні болып ресми бекітілді. Бұл қадам – еліміздегі радиожурналистика тарихына, оның қоғамдағы орнына көрсетілген зор құрмет.
Қазақстандағы радиохабар тарату тарихы 1921 жылдың қазан айынан бастау алады. Сол кезден бері радио ақпаратты кеңінен таратудың сенімді арнасына, халықпен тікелей тілдесудің басты құралына айналды. Қиын-қыстау кезеңдерде елді бірлікке шақырып, қуаныш пен жаңалықты халыққа жеткізуде радионың орны айрықша болды.
Президент Қасым-Жомарт Тоқаев та өз құттықтауында Қазақ радиосының ғасырлық мерекесін ерекше атап өтіп, 1 қазанды Радио қызметкерлерінің кәсіби мерекесі ретінде белгілеуді ұсынды. Бұл – радио саласында еңбек етіп жүрген мыңдаған журналистер мен дикторларға деген лайықты алғыс пен ілтипат.
Бүгінгі күні де радио өз құндылығын жойған жоқ. Керісінше, заманауи технологиялармен қатар дамып, қоғамға жедел әрі сенімді ақпарат ұсынып келеді. Радио – ұлттық мәдениеттің, руханияттың және халық үнінің айнасы.